الجمعة، 2 مارس، 2012

علي هذه الأرض ما يستحق الحياة :)

يعني _واه برده هبدأ بيعني_ تصحي الصبح حاسس ان كل حاجه روتينيه حتي انت نفسك تعابيرك كلها ضحكتك نبرة صوتك نظرتك حتي الكام لفظ اللي بتستعملهم علي انهم شتيمه صحابك نفس الاماكن اللي بتخرجوا فيها نفس هزارهم نفس النكت الغتيته اللي سمعتها مليون مرة قبل كده كل حاجه وكل حد زي بعضها ..
ف ربنا يبعتلك منعنده بكار .. :)) تكتشفت ان بكار بيجي علي القناة الاولي الساعة سبعة الا ربع أو الا تلت بما ان ساعتك بايظة ^_^
تعلي التليفزيون علي اخره عشان تسمع منير وهوبيقول " يا بلااااااادي انا امتي هكبر واطول النخل واقدر " تلاقي كل اللي ف البيت جايين يجروا.. يحدفوك من علي الكنبة ويغنوا معاه " واقطف من ورد توشكي واعملك عقد مرمر" 
تبتسم..تسرح..تزيد ابتسامتك ف تضحك وتعلي صوتك اوي وتغني مع منير تاني "بكاااااااااااار بكااار بكاااااااااااااااااااار" 
وفي وسط عز الانشكاح اللي انت فيه تلاقي الباب بيخبط .. قلبك يوقع في رجليك وتقول اكيد الجيران .. تفتح فتلاقي طنط طيبة كده واقفة تقولك " هما بيعيدوا بكارفي التليفزيون؟؟" تضحك وتقولها اه علي القناة الاولي " تبتسملك وتنادي علي بنتها تقولها ان بكار علي القناة الاولي وتمشي .تتنفس الصعداء انت مفيش تهزئ علي الصوت الحمدلله وقبل ما تقفل الباب انت تلف وتقولك " بس بعد اذنك الصوت يعني " تتكسف ووشك يجيب الوان وتقولها حاضر معلش اسف .
تقفل الباب وانت عارف ان النهاردة مش يوم روتيني.. هو في يوم روتيني يبدأ ببكار ورشيدة؟؟ :)



صوت درويش ومعاه اجمل مزيكا ممكن تسمعها من الثلاثي جبران تحسسك انك ممكن تعيط من كُتر الفرحة والانبساط والانشكاح .. كلمة انشكاح اللي لوحدها تحسسك انك مبسوط اوي فعلا مبسوط طريقة نطق درويش لكلمة "حياة" تشديده لحرف ال (ة) يخليك تبتسم اصله بيعرف ينطق الحياة